Die Anibrandfees van 2011 het getoon dat dit ‘n suksesvolle fees is en dat daar beslis groei potensiaal is vir ‘n fees van hierdie standaard op Uitenhage.

In samewerking met die plaaslike Junior Stadsraad en die leerders van Die Brandwag Hoërskool, het ons ’n paar duisend blikkies kon insamel. Die kos is uitgedeel aan 8 skole in die Uitenhage / Despatch / Kwanobuhle / Kamesh area. Ons hoop om in 2012 meer in te samel en dat verskaffers ook deel sal raak van hierdie belangrike projek deur nie-bederfbare voedsel te skenk.

Ons ondersteun die gemeenskap!

Die fees van 2011 is gekenmerk deur veranderings en groei. Die koninklike troue in Engeland het ons geïnspireer om ons eie twee troues op die terrein te hou. Daar is net twee paartjies benoem en ons kon borge kry vir altwee troues. Dit is wonderlik hoe ’n gemeenskap kan uitreik en saamwerk om ander te help. Met behulp van ongelooflike borge kon ons die totale troues, trouklere, onthaal en wittebrood aan die paartjies skenk. Troues op ’n feesterrein, in ’n tent!!  Sowaar ’n unieke en spesiale geleentheid. Hierdie was net eenmalig, maar beslis iets om te onthou.